【抽筋煙】傳媒的自我修養（2）

　　大概全天下的打工仔其實都走不出「驚衰」、「驚死」、「驚錯」的循環之中，也就導致了我們以為自己辦公其實是「扮工」的困局。簡單而言，就是平平安安渡過每一天都好。想當然，做老細嘅當然希望員工既能有新思維，又能將舊有嘅工作完美完成。但事實上，新思維呢啲嘢，成功係英雄失敗係狗雄當然是Common sense，而其實即使係每日面對不同新聞的傳媒工作者，都只係遵隨慣例，只希望平安度日。(做乜啫，而家記者唔係打份工咩)



話說，作為傳媒工作者之一的抽筋煙，早前的工作少不免與多宗學生自殺有關。而一件比較值得重視的新聞中，通常都會有相關新聞，大多數為1.以往相關事件、2.專家講嘢、3.街訪、4.有關方面的回應、5.死者身世、6.路祭、7.認屍，根據個別情況會有例如警方拉犯、將案件改列牌頭或其他最近進展的即時新聞。而在當中依然可以將某啲新聞重覆又重覆的。(就係好似下面張圖咁悶)



無有錯，雖然路祭、認屍係少不免傷心痛哭，有關方面多數係會話事件警方調查中之外，依然可以有機會將新聞循環再用！就係專家講嘅嘢！當然，係好多情況之下，專家(律師、教授或其他學者)係可以答到你不同個案的特別，但總有新聞的故事是千篇一律的，諸如所有成功自殺事件，死者最終都會「死咗」。而這個時候抽筋煙所工作的報館要訪問的專家，通常都只會得一個，而佢的答案都只係一個：死者抗逆力不足。

當然，做打工仔嘅，簡簡單單問完再Copy&Paste自己以前打落嘅嘢係非常爽皮的事。但作為傳媒，尤其是後生又熱血嘅傳媒(例如我)，總會心有不甘，係咪可以咁輕易的將近乎每日一跳的學生自殺個案，歸咎去青少年生活太幸福，導致抗逆能力不足，需要同家長多啲溝通的答案之中？

於是，有一次抽筋煙選擇致電詢問了一位精神科醫生，還記得醫生當日清晨於電台節目分享過看法，及後接受抽筋煙訪問時，分別提及了中國人習慣逃避處理情緒問題，衰野就由得佢過去，於是學童壓力無法排解；以及現今兒童情緒病的趨勢年輕化，有學童做功課「做到喊」，亦有小學生連玩都無力，指出當今的教育制度下其實不過惡性循環，令人不勝唏噓。

抽筋煙做完訪問後，理所當然地動筆寫下新的觀點，棄用之前那位專家(當然，其實之前位專家都問了好多日，你唔悶我都悶)。打算用手中之筆多寫一個觀點。結果，相信大家都會估到。大概兩三個鐘之後，主管叫接更的同事重新訪問之前那位專家，再一次將問題，歸咎於現今世代「唔捱得」。

Well，差啲唔記得，傳媒都只不過係驚犯錯嘅打工仔。