又是一個平凡不過的下午，和所有打工仔一樣，我如常從人群中擠進入公司大堂中的電梯，稍為在電梯中喘息一下後按下四字。再從四樓的餐廳中買一份午餐後，返回八樓的工作所在，匆匆坐下後，一邊把味如嚼蠟的魷魚肉餅飯往口裡送，同時在電腦內點開今日的稿單......
「唉吊，又係南亞......」
相信大家對我的工作已經心裡有數，雖然作為全香港最有公信力報章嘅員工之一，但所謂工作，不外乎都好似上面第一段嘅文字一樣咁悶。當然，工作悶嘅原因除咗公司真係好沉醉係南亞兵團犯案無日無之外，仲有另外一個原因。
「阿超，單嘢點解對家有個個point？你有無跟實？你有無帶個腦返工？」講緊嘢，絕對年過五十，頂住個啤酒肚嘅係我上司，佢姓黃，全名係咩我相信你都無興趣知，所以都係稱呼佢皇上得㗎喇，反正基本上佢講嘅都係聖旨，而我，深感榮幸地成為佢的愛妃──即係平均嚟計每日都會被佢翻牌子翻中然後吊一鑊。
好，我諗應該無人想知點解作為一間全香港最有公信力嘅報紙，時常都會有對家有料我地無料哩個問題，要歸根究柢可能就要去追溯麥當勞足三兩係咪真係足三兩一樣咁無聊。如果你要我用一個原因去解答呢個問題，我只能夠答你......因為我地呢度真係無料囉......
雖然我只係剛剛返到公司櫈未坐暖，亦未收齊早更同事嘅資料以便跟進。但皇上吊的永遠是對的，唔係點叫聖旨呀大佬，我決定沉默以對，反正我駁嘴都只會比人吊多一鑊。
「呢單野無料㗎......你照睇即時新聞得㗎喇。」而係我面前報料比我，除了下盤稍為粗大外，外貌同身形無甚特點，一出街可以完美融入人群之中，保證你用顯微鏡都搵唔到嘅港女係阿儀。嚴格嚟講，所謂的報料都只係將即時新聞影印一份比我，相信我，如果由我處理佢嘅工作的話，我可以做得好十倍，我會影印夠十份，然後將佢嘅經典對白講十次，再輕輕鬆鬆逗人工。
同其他辦公室一樣，阿儀哩一類人永遠都會出現，普遍嚟講有一個好叻嘅特點，就係無論大新聞定小新聞，去到佢手上就係無新聞。成個朝早嘅扮公時間可以無做過野咁唔會有成果交到比你，就好似大學時期做Project嘅Free Rider咁要你所有野從頭做起，但又永遠可以避開皇上嘅監視。哩類人通常都係上司覺得佢無乜野然後同事憎到死嘅類型。但鑒於我地嘅薪金水平除以工作量，再考慮埋比皇上寵幸嘅次數，我諗，佢都係一個叻人嚟。
至於其他同事，我相信如果我水蛇春咁同你介紹，十個人入面有十個都唔會記得邊個打邊個，所以我決定以後有機會先再提，順便可以襯處理每日千篇一侓嘅南亞禍港無日無之時，同大家介紹自己，順便提提工作悶的另外一個原因。
我叫阿超，同時，我有一個秘密身份，我係超人。
好啦，認真咁講，我並唔係電影入面着紅底橫、紅披風，心口再放雞乸咁大隻S字嘅外星人，我只係咁岩得咁橋同佢一樣，擁有刀槍不入嘅身體，大大力同時又識得飛，仲由超級聽力、視力同熱射線等等，而又係喺一間彰顯正義、好有公信力嘅報館都做記者。除此之外，我同佢一啲相似嘅地方都無，至少我之前簽咗幾萬蚊健身課程最後都無令我擁有健碩身材，大腿仲未有佢手臂咁粗。
可能你會問，超人同工作悶有咩關係。我會答你你都傻嘅，超人既然每日都要行俠仗義，識得揀一定會揀突發記者嚟做，我有理由相信真正個超人同我都係因為同一個原因。你諗吓，你每日放工都會救人，令好多天災人禍化為無形，無論大新聞定小新聞，只要我出動飛一轉就會變成無新聞，如果你仲係一個突發記者的話......
咁返工自不然咪可以做少啲囉。
0 意見:
張貼留言